Հայաստանի մի շարք բնակավայրերում քամին վնասներ է հասցրել

Փրկարարները տեղում մեքենաների վրայից հեռացրել են թիթեղները, իսկ մի կիսաքանդ տան տանիքի փլուզված մասն ապամոնտաժել են։

ԵՐԵՎԱՆ, 25 մարտի – Sputnik. Այսօր Շիրակի մարզում ուժեղ քամուց շենքերի տանիքներ են վնասվել։ Տեղեկությունը հայտնում է ԱԻՆ մամուլի ծառայությունը։

Մասնավորապես ժամը 16։11-ին Շիրակի մարզային ճգնաժամային կառավարման կենտրոն ահազանգ է ստացվել, որ ուժեղ քամուց վնասվել են Մարալիկ քաղաքի 2-րդ թաղամասի 1-ին և 2-րդ շենքերի տանիքների թիթեղները:

Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։

Պարզվել է, որ ուժեղ քամու հետևանքով 1-ին և 2-րդ շենքերի տանիքներից պոկվել են թիթեղներ և վնասել բակերում կայանած «Mercedes Benz» և «Opel» մակնիշների ավտոմեքենաները. տուժածներ չկան: Փրկարարները մեքենաներից հեռացրել են թիթեղները։

Իսկ ժամը 15:54-ին տեղեկություն է ստացվել, որ ուժեղ քամուց վնասվել է Գյումրի քաղաքի Վարպետաց փողոցում գտնվող կիսաքանդ տան տանիքը:

Փրկարարները Գյումրու քաղաքապետարանի ավտոամբարձիչի օգնությամբ ապամոնտաժել են տանիքի վտանգավոր հատվածի փայտյա և թիթեղյա կառուցատարրերը և սահմանազատել տարածքը:

Մարտի 25-ին, ժամը 14։35-ից 17։40-ն էլ Ճգնաժամային կառավարման ազգային կենտրոն ահազանգեր են ստացվել, որ Երևանի Իսակովի պողոտայում, Մոլդովական, Բայրոնի, Ֆուչիկի փողոցներում ուժեղ քամու հետևանքով վնասվել են շենքի թիթեղներ, ծառեր, գովազդային վահանակներ։