Cryptocurrency Prices by Coinlib

«Արհամարհանքը բերում է պատասխան քայլերի»․ «Լոռին» լքում է Հայաստանի առաջնությունը

d5a1d680d5b0d5a1d5b4d5a1d680d5b0d5a1d5b6d684d5a8 d5a2d5a5d680d5b8d682d5b4 d5a7 d5bad5a1d5bfd5a1d5bdd5add5a1d5b6 d684d5a1d5b5d5ac 6052049daabb6

Երեկ «Լոռի ՖԱ»-ի ֆուտբոլիստները լքել են խաղադաշտն «Արարատի» հետ հանդիպման մեկնարկում, իսկ ժամեր անց ակումբի սեփականատեր Թովմաս Գրիգորյանը հայտարարել է, որ ակումբը լքում է Հայաստանի առաջնությունը։

««Լոռի» ֆուտբոլային ակումբը ոչ սպորտային որոշում կայացրեց՝ չսկսելով հանդիպումը Երևանի «Արարատի» հետ, ինչի համար ներողամտությունս եմ հայցում «Լոռիի» երկրպագուներից, ստադիոնում և հեռուստաէկրանների մոտ հավաքված ֆուտբոլասերներից։

Բայց սա անելանելի քայլ էր, քանի որ ՀՖՖ-ն արհամարհական կեցվածք է ընդունել «Լոռի»  ակումբի նկատմամբ: Մեր երկու դիմումներից մեկը` ՀՖՖ բողոքարկման կոմիտե, քննարկվում է 8 ամիս անց, սակայն ՀՖՖ-ն կրկին չի բարեհաճում հրապարակել կոմիտեի որոշումը։

Նման անառողջ մթնոլորտում չեմ պատրաստվում շարունակել պայքարը ՀՖՖ-ի գծած սցենարով, որտեղ նրանց համար ակումբները բաժանված են յուրայինների և օտարների։ Ծանր է կայացնել այս անմարդկային որոշումը. «Լոռին» կյանք է, մարզը ապրում է ֆուտբոլով, թիմը պայքարում է ամենաբարձր մրցանակային տեղերի համար։ Այս պարագայում չի մնում այլ քայլ՝ պայքարելու ՀՖՖ-ի անարդարությունների դեմ, ուստի որոշում եմ կայացրել` դադարեցնել «Լոռի» թիմի մասնակցությունը ՀՀ առաջնությունում»,- ասվում է Թովմաս Գրիգորյանի հայտարարության մեջ։

Հայաստանի ֆուտբոլի ֆեդերացիան խաղից հետո գրել է, որ հանդիպման պատվիրակը և գլխավոր մրցավարը սպասել են 10 րոպե՝ հնարավորություն տալով «Լոռի ՖԱ»-ի ֆուտբոլիստներին վերադառնալ խաղադաշտ:

««Լոռի ՖԱ» ֆուտբոլիստները, առանց «Լոռի ՖԱ» ակումբի կողմից որևէ հիմնավոր պատճառ ներկայացնելու, չեն վերադարձել խաղադաշտ, ինչի հետևանքով էլ հանդիպումը չի կայացել:

Միջադեպի կապակցությամբ, համաձայն ՀՖՖ Կարգապահական և էթիկայի կոմիտեի հոդված 33-ի կետ 12-ի, կներկայացվի միջնորդություն ՀՖՖ Կարգապահական և էթիկայի կոմիտեին, որի նիստի ընթացքում էլ կկայացվի հանդիպման վերաբերյալ վերջնական որոշումը»,- ասվում է ֆեդերացիայի հայտարարության մեջ»։

Ակումբը նաև սույն թվականի մարտի 2-ին դիմել էր ՀՖՖ բողոքարկման կոմիտե՝ ԲԽ 7-րդ տուրից հետաձգված «Լոռի ՖԱ»-«Ալաշկերտ» խաղում ֆուտբոլ խաղի կանոնների խախտման (4-րդ դադարով փոփոխություն կատարելու համար) պատճառով հյուր թիմին տեխնիկական պարտություն գրանցելու նպատակով։

Մարտի 12-ին տեղի է ունենցել ՀՖՖ բողոքարկման կոմիտեի նիստը, որի ընթացքում քննարկվել է վերոնշյալ հարցը։ «Լոռիի» ներկայացուցիչները մասնակցել են լսումներին։

Խնդիրը նրանումն է, որ Հայաստանի Vbet Պրեմիեր լիգայի 7-րդ տուրից հետաձգված «Լոռի ՖԱ»-«Ալաշկերտ» հանդիպման 84-րդ րոպեին «Ալաշկերտի» մարզչական անձնակազմը օգտագործեց փոփոխություն կատարելու երրորդ դադարը՝ փորձելով փոխարինել երկու ֆուտբոլիստների։

«Բայց ինչ-ինչ պատճառներով նրանցից միայն մեկը մտավ խաղադաշտ` N7 Վանգու Գոմեսին փոխարինեց N19 Կամարան։ Տեղի ունեցած որոշակի դադարից հետո մրցավարը սուլիչով հրահանգեց խաղը շարունակել, գնդակը մտավ խաղի մեջ, իսկ հետո, հաջորդ դադարին մրցավարը թույլ տվեց չորրորդ դադարով կատարել ևս մեկ փոփոխություն՝ N8 Գագիկ Դաղբաշյանին փոխարինեց N4 Յովանովիչը։

ՖԻՖԱ-ի ֆուտբոլ խաղի կանոնների 2020/21 թթ․ մրցաշրջանի խմբագրության համաձայն՝ թիմը իրավունք ունի խաղի հիմնական ժամանակի ընթացքում կատարել առավելագույնը 5 փոփոխություն՝ առավելագույնը 3 դադարով, ընդ որում՝ ընդմիջմանը կատարված փոփոխությունները չեն հաշվվում: Խաղի կանոնների համաձայն՝ մրցավարն իրավունք չունի իր հայեցողությամբ թույլ տալ 4-րդ դադարով կատարել փոփոխություն։ Ուստի վերոնշյալ խաղում «Ալաշկերտն» օգտվել է 4 դադարից, ինչն օրենքի կոպտագույն խախտում է և պատժվում է տեխնիկական պարտությամբ»,- ասվում է «Լոռիի» հայտարարությունում։

Վանաձորի «Լոռիի» փոխնախագահ Վահան Դանիելյանը նշում է, որ իրենք 8 ամիս սպասում էին ՀՖՖ-ի բողոքարկման կոմիտեի նիստին, ի վերջո, այն կայացավ անցած ուրբաթ, որի ժամանակ իրենք ներկայացրին բոլոր հնարավոր փաստարկները։

«Մնում էր քվեարկություն կատարվեր և հրապարակվեր արդյունքը, բայց մինչ այժմ չկա պատասխանը։ Արհամարհանքը բերում է պատասխան քայլերի, և «Լոռիի» որոշումը, որքան էլ ցավոտ և ոչ մարզական կարելի է համարել, բայց ես աջակցում եմ այն, առաջին անգամ ֆուտբոլային կյանքում։

2017 թվականից կանգնած եմ եղել «Լոռի» ակումբի ստեղծման ակունքներում, գիտեմ՝ ինչ դժվար է ստեղծել ֆուտբոլային ակումբ, դժվար է պահել այն և զարգացնել ենթակառուցվածքները։

Դժվարին և հակասական զգացումների օր էր, հիմնադիր նախագահի, ֆուտբոլիստների, մարզիչների, ադմինիստրատիվ աշխատողների և, իհարկե, իմ համար։ Իրոք, անելանելի վիճակ էր հանդերձարանում։

Բայց պայքարն առջևում է»,- նշում է Վահան Դանիելյանը։

«Լոռիի» մենեջեր Սպարտակ Պետրոսյանը նշում է, որ դժվար էր հանդերձարանում կանգնել տղաների առաջ ու «սիրտը կտոր-կտոր լինելով»՝ ասել, որ իրենք չեն խաղալու։

«Նախորդ ուրբաթ օրը կայացած ՀՖՖ բողոքարկման կոմիտեի նիստին ակումբից ներկա էինք ես, Վահանն ու մեր իրավաբանները։

Մոտ ժամուկես տևած լսումներից դուրս ենք եկել հպարտ ու հաղթած, որովհետև իրավական դաշտում էապես ուժեղ էինք։ Պայքարել ենք մեր իրավունքների, ֆուտբոլում արդար խաղի կանոնները պահպանելու համար։

Ներկայացված երկու միջադեպերի վերաբերյալ էլ ներկայացրել ենք լրիվ բավարար փաստարկներ՝ ընդամենը մեկ օրում անաչառ որոշում կայացնելու համար, բայց դիմացի մայթում այլ տրամադրություններ են։

Կան փաստեր ու օրենքներ, որոնք հերքել ու խախտել չի կարելի, իսկ մեր պայքարն այդ օրենքները խախտելու դեմ պատիժ կիրառելու համար ա։ Երկու դեպքերի մասով էլ կան սպառիչ պատասխաններ բոլոր հարցերին, որոնք մենք արդեն տրամադրել ենք ՀՖՖ համապատասխան մարմնին։

Անպատկերացնելի դժվար էր հանդերձարանում կանգնել տղաների առաջ ու սիրտը կտոր-կտոր լինելով՝ ասել, որ չենք խաղալու, երբ էդ բոլոր տղաների աչքերում կրակ էր վառվում, ու պատրաստ էին մինչև վերջին շունչն էսօր կռիվ տալ ու հաղթել։ Բայց մենք էսօր չենք խաղացել միասին, բոլորս իրար հետ, համախմբված՝ իսկական թիմի պես։

Ու մինչև վերջ կռիվ ենք տալու ու պայքարելու ենք մեր իրավունքների համար՝ հնարավոր բոլոր միջոցներով ու օրենքի ամբողջ ուժով»,- նշում է ակումբի մենեջերը։

Սիրարփի Աղաբաբյան